Fréttir

18/09/2018

„Við getum ekki talað um raunverulegt frelsi til búsetu á meðan grunninnviðir eru með svo mismunandi hætti um landið að það eru einfaldlega ekki sömu tækifærin.“ Sagði Þórdís Kolbrún Reykfjörð Gylfadóttir, ráðherra ferðamála, iðnaðar og nýsköpunar, á Alþingi í gær í óundirbúnum fyrirspurnartíma um raforkuöryggi þjóðarinnar. Sagði hún jafnframt að staðan í raforkuöryggi Vestfjarða væri óásættanleg. Fyrirspyrjandi var Hanna Katrín Friðriksson, þingmaður Viðreisnar, sem spurði ráðherra almennt út í fyrirætlanir ríkisstjórnarinnar í uppbyggingu raforkukerfisins en einnig sérstaklega um hlutverk Hvalárvirkjunar í þeirri uppbyggingu.

30/08/2018

Hugmyndir um virkjun Hvalár í Ófeigsfirði á Ströndum eru orðnar nær hundrað ára gamlar og má rekja þær allt til árdaga virkjunarframkvæmda á Íslandi. Hvalá er nefnd á nafn með ýmsum öðrum álitlegum virkjunarkostum á Íslandi í tímaritinu Fylki í maí 1920 þar sem fjallað er ítarlega um raforkumál landsins og þá orkukosti sem Íslendingar stóðu frammi fyrir á þeim tíma.

Þá var Hvaláin talin vera 4-5 m³/s með 200 m fallhæð. Óneitanlega var um nokkuð vanmat að ræða á þessum tíma þar sem áætlanir í dag gera ráð fyrir a.m.k. 15 m³/s úr Hvalá og Rjúkanda og um fimm m³/s úr Eyvindarfjarðará. Einnig er fallhæðin vel yfir 300 og því talsvert meiri en menn áætluðu fyrir heilli öld.

9/07/2018

Ásgeir Margeirsson, stjórnarformaður VesturVerks, var gestur Kristjáns Kristjánssonar í útvarpsþættinum Sprengisandi í gær, sunnudag. Fóru þeir ítarlega yfir flest það sem rætt hefur verið og ritað um fyrirhugaða Hvalárvirkjun.

Skipulagsstofnun staðfesti nýverið breytingar á aðalskipulagi Árneshrepps en breytingarnar gera VesturVerki kleift að hefja undirbúningsframkvæmdir vegna Hvalárvirkjunar. Er staðfestingin mikilvægur áfangi í undirbúningi virkjunarinnar sem nú hefur staðið samfellt í rúman áratug innan þess ramma sem lög og reglur hér á landi segja fyrir um.

14/06/2018

Nú hafa allar skýrslur, sem tengjast Hvalárvirkjun eða öðrum verkefnum VesturVerks, verið gerðar aðgengilegri á einum stað hér á vefsíðu fyrirtæksins undir flipanum "Skýrslur" efst í hægra horni síðunnar. Er það gert til að auðvelda áhugasömum aðgengi að öllu því vandaða og faglega efni sem safnast hefur saman á liðnum árum - einkum í tengslum við Hvalárvirkjun.

15/05/2018

Fundurinn Rafmagnaðir Vestfirðir, sem haldinn var af VesturVerki á Ísafirði í byrjun maí, hefur mælst vel fyrir meðal íbúa á Ísafirði og nágrennis. Hátt í hundrað gestir sátu fundinn þegar mest lét og hlýddu þeir á erindi þriggja framsögumanna, frá Landsneti, Orkubúi Vestfjarða og VesturVerki. Glærukynningar hafa nú verið gerðar aðgengilegar á vefnum.